நப்பீட்டியா

இத்தலைப்பைப் படித்ததுமே நமீபியா, ஜாம்பியா போல ஏதோ ஆப்பிரிக்க நாடொன்றின் பெயர் எனவும். பாட்ரீஷியா, மக்டலீனா போலப் பெண்பால் பெயர் எனவும் நினைக்கத் தோன்றும்.


நம்புங்கள்.... இஃதொரு தமிழ்ச் சொல், நாற்பது நாற்பத்தைந்து வயதுக்கு மேற்பட்டோரிடையே இன்னமும் கொங்குப் பகுதியில் புழங்கும் வட்டார வழக்கு இது.

நிரப்பி விட்டாயா என்பதன் பேச்சுவழக்கு தான் "நப்பீட்டியா..... !"
உதாரணம், குடுவையிலோ குடத்திலோ நீர் நிரப்பச் சென்றவரிடம் 'நப்பீட்டியா?' எனக் கேட்பது இன்னும் சிற்றூர்ப் பகுதிகளில் நிலவி வருகிறது . நெப்பீட்டியா என்று கேட்பவர்களும் உண்டு.

"நிரப்பி விட்டாயா...?' என்பதை "நப்பீட்டியா...?" என்று கேட்பதைப் போல "நிரம்பி விட்டதா?" என்பதை "நம்பீருச்சா ?" என்கிறார்கள் . "நெம்பீருச்சா என்பவர்களும் உண்டு .

தமிழகத்தின் நடு மற்றும் வட பகுதிகளில் "ரொப்பிட்டியா?' என்று இச்சொல் புழங்கி வருகிறது.
ரொம்புதல் - நிரம்புதல்
ரொப்புதல் - நிரப்புதல்.

நப்பீட்டியா, நப்பி வெய்யி, நப்பவே இல்ல , நப்பு ,நப்பாத ,

நெப்பீட்டியா,நெப்பி வெய்யி , நெப்பவே இல்ல, நெப்பு , நெப்பாத ....

இவையெல்லாம் பல்வேறு விதமான பயன்பாடுகள்.

அதேபோல அதிகமாக, மிகவும், நிறைய, மிகுதியாக என்ற சொற்களுக்கு ரொம்பவும் என்ற சொல் பேச்சு வழக்கில் பல இடங்களிலும் பயன்படுத்தப்படுகிறது .

உதாரணமாக, குளிர் மிகுதியாக உள்ளது என்பதை ரொம்பவும் குளிருது என்று சொல்வது பேச்சு வழக்கு .
இதுவே கொங்கு வட்டாரத்தில் நம்பவும் அல்லது நம்பாவும் என்று வழங்கப்படுகிறது.

நம்பக் குளுருது
நம்பாவுங் குளுருது என்பன கொங்கு வட்டாரப்‌ பயன்பாடுகள் .

நம்பாக் காய்ச்சல் அடிக்கிதா என்றால் காய்ச்சல் மிகுதியாக இருக்கிறதா எனப் பொருள்.

நம்பாக் காயி இந்த சலக்கா- இம்முறை மிகுதியான காய்கள் காய்த்திருக்கின்றன.

நம்பவும் பண்ணக்கூடாது - நம்பாவும் பண்ணக் கூடாது - அதிகமாக செய்யக் கூடாது .

குறிப்பாக அதிகமாக அலட்டிக் கொள்ளுதல் , பிகு பண்ணுதல் என்பன போன்ற இடங்களில் இதைப் பயன்படுத்துகின்றனர்.

நம்பாவும் பண்ணக்கூடாது- இதற்கு இணையான நவீன வடிவம் ”ரொம்ப ஓவராப் பண்ற”

அடுத்து,
நம்பா அண்ணம் - அதிக எண்ணிக்கை

” நம்பா அண்ணம் பூச்சி பிடிச்சிருச்சு”- அதிக எண்ணிக்கையிலான காய்கள் பழங்கள் பூக்கள் பூச்சியால் அரிக்கப்பட்டிருக்கின்றன

எண்ணம் என்பது எண்ணிக்கை என்பதைக் குறிக்கும் அது கொங்கு பேச்சுவழக்கில் அண்ணம் என்றாகிறது

இன்னமும் மலையாளத்தில் எண்ணிக்கையை எண்ணம் என்றே கூறுகிறார்கள்

”பழம்பூரி உண்டா ?”

”எத்தர ?”

”ரெண்டெண்ணம்?”

”நாலெண்ணம் மதி”

எண்ணுதல் - எண்ணிக்கையும் நினைத்தலும்.

எண்ணுதலில் இருந்து எண்ணம் .

எண்ணம் -எண்ணிக்கை , நினைப்பு

மனதுக்குள் நினைத்தவாறே எண்ணுவதால் இரண்டும் ஒன்றே .

இணைந்திருப்போம்...

Comments

Post a Comment

நன்றி நண்பரே..! மீண்டும் தங்களின் வருகையை ஆவலுடன் எதிர்பார்க்கிறேன்!

Popular posts from this blog

ஊராட்சி ஒன்றிய நடுநிலைப்பள்ளி செஞ்சேரி-- ஆண்டுவிழா 2023- வாழ்த்துப்பா

  செந்தேர் உருளும் செந்தேன் கமழும் செஞ்சேரி ஊருக்கு -அங்கே செந்தமிழ் மலரும் சிந்தை குளிரும் செல்லும் யாருக்கும்..! வந்தோர் எவரையும் வாய்கள்ஆர வாழ்த்தி வரவேற்கும் - வாய்ப்புத் தந்தே வணங்கி வாழ வழிதரும் தலைமுறை தலைமுறைக்கும்..! உழைப்பும் தொழிலும் உயர்வும் மகிழ்வும் ஊரின் அடையாளம் -வாழ்வு தழைக்கும் படியொரு தன்மைக்கு இதுவே தரணியில் உவமானம்..! பெருமை மிகுந்த ஊருக்கின்னோர் பெயர்தரும் இடம் உண்டு- அழியாத் திருவாம் கல்வி புகட்டும் பள்ளி தெரிவோம் இங்கின்று..! மாணவர் வாழ்வில் ஒளியினை ஏற்றும் மாண்புறு அரும்பள்ளி- கல்வித் தேனவர் அருந்தி வெற்றியைப் பெரிதாய்த் தீட்டிடும் பெரும்பள்ளி..! அழியாச் செல்வம் கல்வியை வாரி அளிக்கும் கையள்ளி- அவர்தம் வழியாய் ஒளியாய் வாழ்வில் உருவாய் வரமாய் வரும்பள்ளி..! மழலையர் வாழ்வில் உன்னத நெறியுடன் மனிதம் புகுத்துங்கள்- நாளை...
மேலும் படிக்க இங்கே சொடுக்கவும்!

தலைமை ஆசிரியர்- அறிந்து கொள்வோம்-உடம்படுமெய்‌ - புணர்ச்சி

 தலைமையாசிரியர் என்று சேர்த்து எழுதிய போது தலைமை ஆசிரியர் என்று பிரித்துத்தானே எழுத வேண்டும், தலைமையாசிரியர் என்று சேர்த்து எழுதுவது பிழையல்லவா என நண்பர் ஒருவர் கேட்டார். கேட்டவர் யார் என்பது இப்பொழுது நினைவில் இல்லையென்றாலும் இதில் இருக்கும் இலக்கணம் என்ன என்பதைப் பார்க்கலாம். தலைமை + ஆசிரியர்---தலைமையாசிரியர்  இதுபோல் பிரித்து எழுதுக, சேர்த்து எழுதுக என்பவை எல்லாம் தொடக்க நிலை வகுப்புகளிலேயே தமிழ்ப் பாடத்தில் நமக்குத் தரப்படும் பயிற்சிகள்.  இரண்டு சொற்கள் ஒன்று சேர்வதைப் புணர்ச்சி என்கிறோம். முதலில் இருக்கும் சொல்லை நிலைமொழி என்றும், இரண்டாவதாக வரும் சொல்லை வருமொழி என்றும் சொல்வோம்.  இங்கு, தலைமை + ஆசிரியர் என்பதில் தலைமை என்பது நிலைமொழி. ஆசிரியர் என்பது வருமொழி.  உண்மையில் இரண்டு சொற்கள் இணையும் போது நிலைமொழியின் இறுதியெழுத்தும், வருமொழியின் முதலெழுத்தும்தான் புணர்கின்றன. இறுதியெழுத்தை ஈற்றெழுத்தென்போம்.சில இடங்களில் இயல்பாகவும் ,சில இடங்களில் மாற்றங்களுடனும் புணர்ச்சி நடைபெறும். உதாரணத்துக்கு, ஒன்றுடன் ஒன்று இணையும்‌ சொற்களின் இறுதியெழுத்து-முதலெழுத்து ...
மேலும் படிக்க இங்கே சொடுக்கவும்!

எண்ணை.... எண்ணெய்...எது சரி ?

பலரும் எண்ணை என்று சொல்லியும் எழுதியும் வருகின்றனர். எண்ணெய் என்பதுதான் சரி. அதிலும் எண்ணெய்‌ என்பது நல்லெண்ணெய் எனப்படும் எள் எண்ணெயை மட்டுமே குறிக்கும் .ஆனால் வழக்கத்தில் எண்ணெய் என்பது பொதுப்பெயர் ஆகி வெகு நாட்கள் ஆகிவிட்டது. எள் +நெய் என்பதே எண்ணெய் எள் + நெய் ~ எண்ணெய் நெய் என்பது பொதுப்பெயராகத்தான் இருந்திருக்கிறது. எள்ளில் இருந்து எடுக்கப்படும் நெய்தான் எண்ணெய். எள்+ நெய் எப்படி எண்ணெய் ஆகிறது ....? மெய்யீற்றுப் புணர்ச்சி விதியைப் பார்ப்போம். இரண்டு சொற்கள் ஒன்றுடன் ஒன்று புணரும் போது முதற்சொல்லான நிலைமொழியின் இறுதி எழுத்து மெய்யெழுத்தாக இருந்தால் அது மெய்யீற்றுப் புணர்ச்சி ஆகும். எள் +நெய் என்பதில் 'ள்' என்னும் மெய்யெழுத்து நிலை மொழியின் ஈற்றெழுத்தாக இருக்கிறது. வருமொழியின் முதல் எழுத்துக்கள் 'த' அல்லது 'ந' என்பனவாக இருக்கும் பொழுது நிலை மொழியின் ஈற்றெழுத்துக்கள் ன்,ல்,ண்,ள் என்பனவாக இருந்தால் புணர்ச்சி எப்படி நடக்கும் எனக் கீழ்க்காணும் நன்னூல் விதி கூறுகிறது. ”னலமுன் றனவும், ணளமுன் டணவும், ஆகும் தநக்கள் ஆயுங் காலே” (நன்னூல், 237) இவ்வித...
மேலும் படிக்க இங்கே சொடுக்கவும்!